A nova infraestrutura, que conta con cinco caldeiras de última xeración de 990 kW cada unha, está situada xunto á Escola Politécnica Superior de Enxeñaría. Dende ela parten máis de cinco quilómetros de tubaxes que achegarán calefacción e auga quente a unha vintena de edificios universitarios.
A reitora da USC, Rosa Crujeiras, acompañada polo vicerreitor de Coordinación do campus, Roberto Bande, destacou que esta rede de calor supón un avance cara a "unha universidade máis sostible, máis eficiente e máis comprometida co seu contorno", ademais de situar ao campus lucense como "referente no uso de enerxías renovables para usos térmicos".
A planta central, que opera automaticamente, dispón de depósitos con capacidade para 15.000 litros, o que garante unha autonomía de polo menos 15 días ante calquera eventualidade. A maioría dos edificios contan cunha subestación de 500 litros, agás un que se abastece doutro por falta de espazo.
Este sistema, que non operará en xullo e agosto por razóns de custo, permitirá prescindir das caldeiras que utilizan combustibles fósiles. A planta recibirá semanalmente dous camións de madeira de montes galegos, estimándose un consumo anual de 1.840 toneladas de astillas.
A posta en marcha desta rede de calor suporá unha redución de máis de dous millóns de quilos de dióxido de carbono (CO²) ao ano, evitando case o 94% das emisións asociadas á calefacción dos edificios conectados. Segundo a reitora, isto cumpre "co compromiso da transición enerxética e a mellora das infraestruturas".
A rede abastecerá a facultades como Veterinaria, Administración e Dirección de Empresas, a Escola Politécnica Superior de Enxeñaría, o Instituto Biodiversidade Agraria e Desenvolvemento Rural (Ibader), así como o hospital Rof Codina, o Edificio Cactus, a Biblioteca Intercentros, o complexo docente, a facultade de Ciencias e a residencia Bal e Gay.
