O titular de Sanidade destacou no Pleno do Parlamento que esta nova adquisición representa un adianto do Plan de alta tecnoloxía do Servizo Galego de Saúde, que prevé a renovación de todo o parque de aceleradores da sanidade pública galega.
A radioterapia adaptativa, segundo explicou Gómez Caamaño, é unha tecnoloxía que permite axustar o tratamento diariamente en función da evolución do paciente, mellorando a precisión e reducindo os efectos secundarios da radiación. O novo equipamento incorpora radioterapia guiada pola imaxe e pola superficie, permitindo calcular a dose necesaria directamente sobre a imaxe obtida no propio acelerador, o que supón evitar probas adicionais e reducir os tempos do procedemento.
A Xunta publicou a licitación do novo equipamento para o servizo de Radioterapia do HULA o pasado 22 de xuño, cun investimento previsto de 2.758.800 euros. O conselleiro remarcou que a atención a pacientes con cancro na provincia de Lugo está garantida e será reforzada con este investimento.
En referencia aos recursos actuais, Gómez Caamaño pediu responsabilidade para non difundir información errónea sobre a atención aos pacientes oncolóxicos. Sinalou que os dous aceleradores lineais que operan no HULA de luns a venres, de 08:00 a 22:00 horas, dan cobertura axeitada á demanda asistencial. Ademais, o Servizo Galego de Saúde conta cun protocolo para facer fronte a avarías, que inclúe o traslado de pacientes a Santiago de Compostela se fose preciso, aínda que asegurou que durante unha avaría na Semana Santa, a continuidade da asistencia non se viu comprometida.
O responsable sanitario da Xunta lembrou que a mellora continua da atención a pacientes con cancro é unha prioridade, citando como exemplo o Centro de Protonterapia de Galicia, que atenderá os primeiros pacientes entre finais deste ano e comezos de 2027.
