O evento, que se celebrará no hotel Méndez Núñez e tamén se poderá seguir en liña, conta coa colaboración da Xunta de Galicia e de Banco Sabadell. A conselleira de Medio Rural, María José Gómez, será a encargada de inaugurar o foro, que comezará ás 10.00 horas.

A programación inclúe a intervención do director rexional para Galicia Norte de Banco Sabadell, así como unha mesa redonda ás 10.40 horas titulada 'Oportunidades dende a calidade e a innovación'. Nesta sesión participarán representantes de empresas como Queixería Prestes, Poder das Flores (mel con Indicación Xeográfica Protexida), Xardinor e Casa Barbeiro.

Posteriormente, ás 12.00 horas, terá lugar a charla 'O sector primario, o primeiro sector', impartida polo CEO de Medrar. A xornada continuará ás 12.40 horas cunha segunda mesa redonda, que abordará 'A remuda xeracional no sector agroalimentario'. Nela intervirán unha gandeira de carne da Fonsagrada, un viticultor e produtor de aceite de Quiroga, unha técnica da oficina rural de Meira e o director do CFEA Pedro Murias.

A clausura do foro correrá a cargo do director da Axencia Galega de Calidade Alimentaria. O encontro busca poñer en valor o gran potencial do sector en Lugo e a súa importancia para o desenvolvemento do rural. As persoas interesadas en asistir aínda poden inscribirse a través do correo electrónico facilitado pola organización.