O encontro, organizado pola escola de inglés Kids&Us coa colaboración da Xunta de Galicia, terá lugar no auditorio da facultade de Veterinaria da cidade. O programa estrutúrase en dous bloques, cun horario de mañá de 9.00 a 12.45 horas e de tarde de 14.15 a 18.30 horas.
Entre os relatores confirmados atópanse o pediatra e autor Carlos González, coñecido pola súa obra sobre crianza e saúde infantil; a podóloga Neus Moya, divulgadora en saúde do pé e calzado consciente; o psicólogo familiar Alberto Soler; e a mestra infantil Sara Noguera, especialista en crianza respectuosa, contoterapia e musicoterapia.
Estes profesionais ofrecerán charlas destinadas a proporcionar recursos prácticos, fomentar o debate e fortalecer a comunidade entre pais, educadores e outros profesionais vinculados ao ámbito infantil. As entradas para asistir ao evento están dispoñibles a través de ATaquilla, con prezos a partir de 27,50 euros.
“"enriquecedor e que supón unha oportunidade para aprender, e medrar xuntos"
A decisión de dar continuidade a este evento xurdiu tras o éxito da primeira edición, que congregou a numerosas persoas interesadas en obter información e consellos para a educación dos seus fillos. Isto demostrou o interese das familias por buscar coñecemento de calidade e espazos de apoio. O delegado territorial da Xunta de Galicia, Javier Arias, presentou o evento xunto á directora da academia Kids&Us, Marta Corral, e animou á participación.
