O alcalde da localidade, José María Arias, sinalou que xa se atopa en contacto co Goberno autonómico para solucionar esta problemática que afecta á seguridade viaria do municipio. Os animais levan meses soltos e pastando sen control polos arredores, causando danos en cultivos e supoñendo un perigo para os condutores, especialmente en vías secundarias onde a súa irrupción na calzada xera un risco notable.
Arias recoñeceu complicacións na xestión, xa que, aínda que cinco dos equinos portan microchip, o resto non o teñen. Son os propietarios quen deben achegar a documentación pertinente para poder recuperalos. O alcalde non descartou posibles sancións por ter os animais soltos durante meses.
O Concello emitiu un bando chamando aos propietarios ou a persoas que puidesen acreditar a titularidade dos animais para que, en prazo de 48 horas, procedesen á súa recollida por motivos de seguridade, benestar animal e custodia. Avisábase que, de non facelo, buscaríase un destino para os equinos.
Sobre a evolución da seca e o efecto das choivas nos pastos, José María Arias minimizou os beneficios das precipitacións recentes, cualificándoas de escasas e insuficientes para a rexeneración das fontes.
