O propietario de Libraría Galicia, Fernando Toubes, aposta polo comercio de proximidade e a vida de barrio coa apertura dun novo establecemento na rúa Ourense, número 69. Esta inauguración marca o terceiro cambio de localización da librería en 45 anos, pero mantén a súa esencia e o seu arraigo no barrio de San Antonio.

O novo local, que supera os 230 metros cadrados, deseñado polo creador lucense Pavís, concíbese como un espazo vivo que variará a súa decoración segundo a tempada e as campañas, ofrecendo unha experiencia renovada aos visitantes.

Unha das principais novidades é a creación dunha zona dedicada a eventos culturais, como presentacións literarias, conferencias, proxeccións, concertos e encontros veciñais, co obxectivo de dinamizar a vida cultural da cidade e do barrio.

Toubes tamén anunciou a recuperación de actividades que tiveron moita acollida, como as charlas en inglés, ademais de novas quedadas musicais e outras propostas participativas. A programación cultural incluirá tamén unha innovadora combinación de mundo editorial e gastronomía, vinculando presentacións de libros con experiencias culinarias.

Máis aló dos libros, Libraría Galicia representa un forte compromiso co seu contorno. Fernando Toubes, considerado un referente comunitario no barrio de San Antonio, leva décadas implicado na vida social, promovendo iniciativas de interese común. A apertura deste novo espazo simboliza a continuidade dunha filosofía de proximidade coas persoas e de entendemento da cidade.