O Concello de Lugo busca aproveitar ao máximo o pantalán instalado no río Miño, á altura dos Robles, antes de que deba ser retirado o vindeiro luns. Para iso, dende hoxe e ata o luns, haberá cinco inchables, dous deles acuáticos, instalados nunha zona de sombra ao carón da piscina dos Robles. O acceso a estas actividades de lecer é gratuíto.
As xornadas de xogos, que se desenvolverán cada día dende as 17:00 ás 20:00 horas, contarán con monitores e servizo de socorrismo, dada a proximidade do río. Estas actividades están dirixidas a nenos de todas as idades e pretenden fomentar o uso deste espazo fluvial.
A iniciativa súmase ao interese do goberno local por manter o pantalán, que só ten permiso ata o martes tras ser autorizado para unha proba deportiva. A alcaldesa, Elena Candia, confirmou que se está a traballar para solicitar á Confederación Hidrográfica do Miño-Sil a súa permanencia como plataforma de baño durante o resto do verán, aínda que o proceso require un mes de exposición pública.
Mentres tanto, o executivo municipal traballa en diversas frontes para dinamizar a contorna, como a posible reapertura das caldas sen límite de idade, funcionando con auga fría para previr problemas de lexionela. Tamén se acondicionou a área de recreo preto da fábrica da luz e a ribeira ata os Robles.
As familias que acudan cos nenos poderán usar os aseos e vestiarios do complexo dos Robles, que colabora na iniciativa. Este complexo tamén dispón de cafetería e piscina, aínda que esta última está en reparación. A zona conta ademais con espazo de aparcamento nas inmediacións.
