A primeira parte do XIX Salón Internacional do Cabalo de Galicia Equigal, que tivo lugar no Pazo de Feiras de Lugo, finalizou este domingo cunha intensa competición. O Arabian Horse Show foi o escenario onde se elixiron os mellores cabalos árabes, cun nivel moi elevado que fixo as delicias dos asistentes.

Entre os gañadores, Jazel Al Shira, da gandería Los Gemelos, impúxose na categoría de Castrados. Nas seccións de Futurity, os recoñecementos foron para AA Xana, de Abarizketa Arabians, e LG Marco, tamén de Los Gemelos, nas categorías de poldras e poldros, respectivamente.

A competición dos exemplares máis novos continuou con Shadya Al Jood, de Al Jood Stud, que se coroou como campioa en Yearling Poldras, mentres que Obixenth Al Zubi, de Zubialdea Arabians, fixo o propio en Yearling Poldros. No Campionato de Poldras, o título foi para Luana Al Shira, e no Campionato de Poldros, o vencedor foi Marwan Al Jood, de Vacor Arabians.

Nas categorías adultas, a máxima distinción recaeu en Tchaata Lady Mona, de Tchaata Arabians, como campioa de Eguas, e en Lazeez Al Shahania, quen se proclamou campión no Campionato de Sementais. A proba de Liberdade tivo como protagonista a SS Dhabia, outorgando outro triunfo á gandería Los Gemelos.

O listado de recoñecementos completouse con Frasera Madalla (mellor pura exipcia femia), Volcán de Isora (mellor pura española femia) e Volcán de Tagoro (mellor puro español macho). Tamén se premiou ao mellor presentador, á mellor capa pinta, á mellor cabeza, aos mellores movementos, e ás mellores poldras e poldros nacidos en Galicia.

O evento culminará a vindeira fin de semana co Concurso de Saltos, onde xinetes e amazonas de toda España medirán as súas habilidades na pista central do Pazo de Feiras.