O programa, que xa conta con 400 participantes, experimentará unha ampliación significativa nas instalacións de Frigsa e As Pedreiras. A iniciativa, dirixida a persoas maiores de 65 anos, busca promover un envellecemento activo a través da práctica regular de actividade física cun custo anual de 7,90 euros.
Ante a alta demanda rexistrada, que esgotou a oferta inicial en tres días, o Concello xa reforzou previamente as quendas de ximnasia, aumentando a capacidade de 50 a 60 persoas por grupo. Non obstante, as listas de agarda manteñen preto de 90 persoas en Frigsa e 30 en As Pedreiras.
A partir do 1 de novembro, habilitaranse 160 novas prazas de ximnasia en Frigsa, con dúas novas quendas (08:15-09:00 e 12:45-13:30), e 40 en As Pedreiras, tamén con dúas quendas nos mesmos horarios. Ademais, ampliarase a oferta de natación os venres en ambas as instalacións municipais.
Esta ampliación busca non só dar cabida ás persoas en lista de agarda, senú que tamén ofrecer a oportunidade de participar a outros maiores interesados. As inscricións poderanse formalizar directamente nas oficinas da piscina de Frigsa.
O Concello de Lugo subliña os beneficios da práctica regular de exercicio físico para manter a mobilidade, fortalecer a musculatura e previr caídas, así como o fomento das relacións sociais e a loita contra o sedentarismo e a soidade non desexada entre as persoas maiores.
