A formación nacionalista, a través da súa secretaria nacional de Organización, Lucía López, e o secretario xeral de Galiza Nova, Artai Gavilanes, xunto a membros dos Consellos Comarcais da Mariña, Lugo Centro e Lugo Sul, manifestou a súa preocupación polo impulso estatal e autonómico cara á normalización do militarismo.

López criticou o aumento do gasto militar por parte do Estado e da Xunta, que prevé mobilizar máis de 900 millóns de euros para o sector a través dunha "Iniciativa Estratéxica en Seguridade, Defensa e Aeroespazo". Segundo a dirixente, esta situación prodúcese nun contexto internacional de "dinámica da guerra impulsada pola OTAN e polos Estados Unidos", que ten consecuencias directas na Galiza, como o incremento dos prezos e a carestía da vida.

Ademais, López denunciou a presenza de actividades militares en espazos públicos e educativos, facendo especial fincapé nos actos da Garda Real nas comarcas de Lugo. Considera "intolerábel utilizar crianzas para campañas de propaganda militar e de branqueamento da monarquía española".

Pola súa banda, Artai Gavilanes cualificou a visita da Garda Real como unha operación de "propaganda ideolóxica" para "enaltecer o españolismo e reforzar a idea de sacrosanta unidade do Estado español". O secretario xeral de Galiza Nova subliñou o compromiso da organización co antimilitarismo e o antiimperialismo, afirmando que "o exército español e a monarquía son os dous piares que garanten a opresión nacional ao noso pobo".

O BNG reiterou a súa petición de cancelación do desfile militar previsto en Vigo para o 30 de maio e fixo un chamamento á participación na manifestación nacional convocada pola Plataforma Galiza pola Paz. A campaña continuará con máis actos, incluíndo un faladoiro o mércores ás 19:30 horas no Centro de Convivencia Uxío Novoneyra de Lugo.