A operación saldouse coa detención de 39 persoas nas provincias de Ávila, A Rioxa e Córdoba. A banda subtraeu un total de 134 quilómetros de cable de cobre, cun peso de 157 toneladas e un valor económico que supera o millón de euros.

A investigación comezou hai un ano tras o coñecemento dun roubo de cable de tendido telefónico en Ávila. As pescudas revelaron que non era un feito illado, senón parte dunha trama máis ampla con numerosos roubos similares en todo o territorio nacional.

Os axentes esclareceron 33 roubos en municipios abulenses e noutras provincias como Asturias, Burgos, Cáceres, León, Salamanca, Valladolid, Zamora e Lugo. Na provincia lucense, os roubos concentráronse en Castro de Rei (nas parroquias de Santa Locaia e O Matodoso), Castro de Ribeiras de Lea, Rábade e Outeiro de Rei (na parroquia de Cela).

Unha nave industrial en Logroño foi localizada como punto clave de almacenamento do cobre roubado, o que permitiu as primeiras detencións de membros da organización.

A rede operaba tamén en Francia e Portugal, con puntos de almacenamento en Bayona e na comarca de Águeda-Aveiro. A organización, composta por cidadáns de Europa do Leste asentados en Córdoba, planificaba e coordinaba os roubos a nivel nacional e internacional.

O seu 'modus operandi' diferíase do habitual, xa que en lugar de vender o material en centros próximos, almacenaban grandes cantidades para o seu posterior traslado por estrada ata Romanía, onde o comercializaban.

A Garda Civil contou coa colaboración da Gendarmería Francesa e da Garda Nacional Republicana de Portugal. Como resultado, ademais de desartellar o grupo, recuperáronse 22 toneladas de cobre subtraído.