A presidenta provincial, Carmela López, desprazouse este martes á localidade para repasar estas achegas e formalizar un novo convenio de colaboración por 137.000 euros. Estes fondos permitirán a renovación da cuberta do centro de saúde, a mellora acústica da nave de usos múltiples e a instalación de dous conxuntos de letras co nome de Pedrafita.
Durante a súa visita, López reivindicou o apoio da institución provincial a concellos de menor poboación, como Pedrafita, que conta con menos de 900 habitantes e recursos limitados. "A Deputación ten que estar aí", afirmou.
A xornada incluíu tamén unha visita á residencia de maiores, con capacidade para 30 usuarios, e a supervisión dunha máquina telescópica adquirida polo Concello cunha achega provincial superior a 67.000 euros.
En materia de mobilidade, Deputación e Concello constataron as obras executadas nos accesos a Rabaceira e Fonteferreira, cun investimento de máis de 83.000 euros do Plan Deputación 2025. Tamén se revisou a mellora da estrada LU-P-1301, entre Seoane do Courel e Hospital, cunha achega de 386.880,92 euros.
A presidenta provincial destacou que investir en mobilidade nun concello como Pedrafita tamén supón investir en igualdade de oportunidades, facilitando o acceso a servizos e permitindo que os veciños "vivir e traballar aquí con máis garantías".
