Desenvolveranse cinco quendas durante os meses de xullo e agosto, cun total de 250 prazas dispoñibles. O delegado territorial de Lugo, Alfonso Villares, visitou hoxe as instalacións para coñecer de preto as actividades.
O programa inclúe unha ampla proposta de actividades deportivas, de natureza, xogos e outras alternativas de ocio saudable. Entre elas, destacan saídas en bicicleta, práctica de tiro con arco, slackline, construcións naturais, técnicas de vivac, obradoiros de conservación do medio e reciclaxe, xincanas de aventuras, ademais de piscina e xogos acuáticos.
Ademais, o albergue acollerá unha quenda adicional de 50 prazas dentro da oferta concertada, pola que a Xunta cede instalacións para programas de ocio e tempo libre organizados sen ánimo de lucro.
O delegado Alfonso Villares sinalou que a campaña 'Modo Verán Activo', promovida pola Consellería de Cultura, Lingua e Xuventude, oferta este ano 2.593 prazas en campamentos, minicampamentos e campos de voluntariado na provincia de Lugo. A nivel autonómico, a cifra total de prazas supera as 11.900 para mozos de 9 a 30 anos.
