O delegado territorial da Xunta en Lugo, Alfonso Villares, presidiu a reunión na que se emitiron informes favorables para os estudos previos en relación con novos procesos de reorganización da propiedade na parroquia vilalbesa de Román e nas de Folgueira, Matela, Vilela e Taboi en Outeiro de Rei.
Os membros do Comité deron o seu respaldo ao desenvolvemento destas áreas tras coñecer os informes sectoriais recompilados pola Dirección Xeral de Desenvolvemento Rural. Unha vez recibido este aval, continuarase coa tramitación regulamentaria previa ao seu decreto.
Ademais, a xuntanza serviu para referendar a continuidade dos traballos na área xa decretada de Arcos, Sobrada de Aguiar e San Lourenzo de Aguiar, tamén en Outeiro de Rei. Neste caso, os técnicos informaron sobre a elaboración das bases de reestruturación e presentaron o Plan de Ordenación de Predios de Especial Vocación Agraria.
O órgano provincial, que coordina a participación de diferentes axentes implicados, contou coa presenza de representantes da Administración autonómica, estatal e local, así como de organizacións profesionais agrarias.




