O alumnado do CIFP As Mercedes e do IES Sanxillao de Lugo poderá realizar prácticas formativas en instalacións municipais grazas a dous convenios asinados hoxe entre o conselleiro de Educación, Ciencia, Universidades e FP, Román Rodríguez, e a alcaldesa, Elena Candia. O obxectivo é achegar os estudantes a contornas reais de traballo co complemento da experiencia dos profesionais destas instalacións.
Os estudantes dos ciclos de grao medio e superior en Emerxencias e Protección Civil do CIFP As Mercedes poderán empregar parte das instalacións municipais do Parque de Bombeiros. A Consellería de Educación achegará o persoal docente e asumirá os gastos de material, mentres que o Concello porá a disposición as instalacións. Esta colaboración fai do centro lucense o único público en Galicia que oferta estes dous ciclos.
Pola súa banda, o Concello de Lugo porá a disposición do IES Sanxillao, dous días ao mes, o posto número 16 da Praza de Abastos para o desenvolvemento de proxectos formativos vinculados á gastronomía e á hostalaría. A materia prima poderá ser subministrada polos produtores da Praza de Abastos ou do Mercado Municipal de Lugo que decidan colaborar.
O conselleiro Román Rodríguez destacou a colaboración institucional do Concello de Lugo en materia educativa, lembrando outros acordos recentes. Sinalou que estes convenios "van contribuír de xeito decisivo a ofrecer unha cualificación máis completa aos estudantes de Formación Profesional, porque lles vai permitir estar en contacto con instalacións e equipamentos reais de traballo".
Ademais, o conselleiro felicitou ao piloto lucense Alonso Liste polo seu terceiro posto na súa categoría no Campionato Europeo de Montaña, cuxo monopraza foi preparado polo CIFP As Mercedes. Alumnos e docentes deste centro colaboraron na mecánica e aerodinámica do vehículo, participando tamén en probas do campionato.
