A firma adxudicataria, Cholo S.L., levará a cabo a construción dun itinerario de algo máis de 1,2 quilómetros, situado en paralelo á marxe esquerda da vía autonómica. Esta nova senda conectará os núcleos rurais de A Ponte e Riazón co obxectivo de fomentar a mobilidade sostible e garantir desprazamentos seguros a pé para a veciñanza.
A intervención, que se executará entre os puntos quilométricos 3+350 e 4+630 da LU-234, contará cun ancho de 2,5 metros e será financiada con fondos FEDER 21/27.
Ademais, mellorarase a accesibilidade da parada de autobús situada no punto quilométrico 4+490. O percorrido empregará formigón coloreado en cor terrizo, reforzado con mallazo de aceiro nos accesos e cruces, e pavimento podotáctil nos cruces municipais e na parada de autobús.
Para minimizar futuras afectacións por obras de redes de servizos, prevese a canalización de telecomunicacións baixo a beirarrúa e proxéctase outra canalización para a rede eléctrica.
