A decisión xudicial revoga unha sentenza previa que impuxera unha multa e a retirada do permiso de conducir. Os feitos remóntanse á mañá do 18 de xuño de 2023, cando a muller conducía un Audi A3 pola estrada LU-703. Tras inxerir bebidas alcohólicas e medicamentos, perdeu o control do vehículo e impactou contra un sinal de perigo.
A condutora foi trasladada ao Hospital Universitario Lucus Augusti (Hula), onde se lle realizou unha analítica que indicou unha taxa de alcol equivalente a 0,50 miligramos por litro de aire expirado. En primeira instancia, o Xulgado Praza número 1 de Lugo condenouna a unha multa de 2.160 euros e á retirada do carné durante un ano, ao considerar probado que a inxesta de substancias a incapacitaba para unha condución segura.
A determinación da concentración de alcol en sangue con efectos probatorios require dunha metodoloxía analítica fiable e contrastada, polo que unha analítica ordinaria no ámbito hospitalario non pode ser por si soa proba de cargo suficiente.
A defensa da acusada presentou un recurso de apelación ante a Audiencia Provincial de Lugo, argumentando que a analítica do Hula tiña fins terapéuticos e non xudiciais, sen seguir os protocolos específicos para análises forenses. Ademais, sinalouse que o informe do hospital mencionaba o uso do método de alcol deshidroxenase, que presenta "imperfeccións e interferencias" e non é axeitado para fins xudiciais, e que o resultado debería confirmarse mediante cromatografía de gases.
Tamén se alegou que, ao tratarse dunha extracción sanitaria ordinaria, puido empregarse alcol para a desinfección, o que alteraría o resultado. A Audiencia Provincial admitiu o recurso, indicando que un accidente vial por si só non permite concluír que a condutora estivese baixo a influencia do alcol, xa que existen "múltiples factores capaces de explicalo, como a fatiga, a distracción ou as circunstancias da vía".
