O Concello de Cee publicou no Boletín Oficial da Provincia da Coruña (BOP) as bases reguladoras do proceso selectivo para a formación dunha bolsa de emprego de arquitecto/a municipal. O obxectivo é atender as necesidades de nomeamento de persoal funcionario interino na praza actualmente vacante, mediante o sistema de concurso-oposición.
A praza corresponde ao Grupo A, Subgrupo A1, cunha xornada a tempo parcial de 18,75 horas semanais. A titulación esixida é o título oficial de Arquitecto/a ou título universitario oficial de Grao que habilite para o exercicio da profesión regulada de arquitecto/a.
O proceso selectivo constará dunha fase de concurso, cunha puntuación máxima de 10 puntos, que valorará formación específica, experiencia profesional e titulación académica complementaria. A fase de oposición terá unha puntuación máxima de 20 puntos e incluirá unha proba de coñecementos de carácter obrigatorio e eliminatorio.
As bases contemplan tamén unha proba de coñecemento da lingua galega para as persoas que non acrediten o CELGA IV ou equivalente. Non obstante, todas as persoas admitidas xa acreditaron o nivel de galego esixido, polo que non será necesaria a realización desta proba.
A listaxe definitiva de persoas admitidas e excluídas foi aprobada polo Concello, sen que se rexistrasen candidatos/as excluídos/as. As persoas aspirantes admitidas quedan convocadas para a proba da fase de oposición o martes, 22 de setembro de 2026, ás 13:00 horas, na terceira planta da Casa da Cultura de Cee.
