A axenda cultural de Cee arranca o venres, 10 de maio, ás 20.00 horas, coa presentación da novela En vísperas de nada, obra de José Pardiñas Alvite. O evento terá lugar no IES Fernando Blanco e contará coa presenza da alcaldesa, Margot Lamela, e o xefe de estudos do instituto, Diego Carril. Esta publicación marca o debut literario de Pardiñas Alvite tras a súa xubilación como profesor de automoción no devandito centro, explorando o mundo rural e a conexión coa terra.
O sábado, 11 de maio, o Auditorio Baldomero Cores será o escenario, ás 20.30 horas, do monólogo cómico Dous rombos. Pasa para a cama!, a cargo de Sergio Alba. O humorista de Monterroso transportará ao público aos anos 80 cun espectáculo que promete ser unha viaxe nostálxica e divertida. As entradas están dispoñibles na biblioteca por 8 euros en venda anticipada e a 10 euros na billeteira o mesmo día do evento.
“"O pasado estará moi presente."
Para pechar a fin de semana, o domingo, 12 de maio, ás 20.00 horas, a música tomará o protagonismo co concerto Música en Camiño 2026, interpretado pola Orquestra e o Coro da Universidade de Santiago. Esta formación, composta maioritariamente por estudantes e membros da comunidade educativa, xunto con colaboradores externos, destaca pola súa capacidade para abordar repertorios de gran formato. O concerto contará coa participación da frautista local Estela Blanco, a directora convidada Anna Melinkhova para o coro, e Blanca Belo como directora convidada para a orquestra, xunto ao seu director titular Mario Diz.
