O evento, que se celebra anualmente en Camariñas, demostrou unha vez máis o seu poder de convocatoria, superando as expectativas e consolidándose como unha das citas ineludibles no calendario cultural de Galicia. A afluencia de público reflicte o interese crecente por esta arte tradicional, que atrae a visitantes de diversas procedencias.
Durante os días da mostra, a xornada do venres destacou como a de maior afluencia, con 6.760 entradas rexistradas. O xoves seguiulle de preto, acadando os 6.054 asistentes. Ademais, os días mércores, sábado e domingo acadaron cifras non vistas desde o ano 2011, con 1.700, 4.669 e 4.256 visitantes respectivamente.
A Mostra segue a afianzarse como un dinamizador para o turismo e a hostelería de todo Camariñas, pero sobre todo son os stands alí presentes os que se benefician do público chegado de todas as partes de Galicia, de España, e de diferentes puntos do mundo.
O peche desta edición, a número trinta e cinco, estivo marcado por un programa cultural variado. Incluíu o espectáculo Fíos de Salitre, a cargo de Mascarada O Cansorriño, así como os tradicionais desfiles de PequEncaixe e Encaixeiras Sénior. A actuación musical de Antía Muíño puxo o broche final a unha exitosa edición.
