O obxectivo da Consellería de Medio Ambiente e Cambio Climático é enriquecer o documento que se remitirá ao Goberno central para a súa posterior tramitación ante a Unesco. O proxecto busca promover o equilibrio entre a preservación dos recursos naturais e o avance económico e social da contorna, sen afectar a actividades como a pesqueira e a marisqueira.
O documento, dispoñible na páxina de transparencia da Xunta de Galicia, é froito do traballo técnico de universidades galegas, o CSIC e outros centros de investigación. Conta xa con máis de 40 cartas de apoio, incluíndo 23 concellos da área de influencia, as deputacións da Coruña e Pontevedra, as tres universidades, o padroado do Parque Nacional das Illas Atlánticas e as sete reservas xa existentes.
A candidatura tamén recolleu o apoio de entidades e asociacións do sector pesqueiro e marisqueiro, cos que se mantiveron reunións para asegurar que estas actividades, importantes na zona, non se verían afectadas. As reservas actuais en Galicia son exemplo de que esta declaración non limita o aproveitamento dos recursos.
O programa Home e Biosfera (MaB) da Unesco sinala que estas áreas harmonizan a conservación da biodiversidade co desenvolvemento sostible e o benestar da veciñanza, fomentando a investigación, educación e formación para a conservación.
