A Consellería de Medio Ambiente e Cambio Climático deu luz verde ás instalacións e liñas de evacuación do parque eólico Paxareiras II, proxectado nos concellos coruñeses de Cee e Dumbría. Esta resolución responde a unha retramitación para adaptar o proxecto ao marco legal vixente, que inclúe a valoración expresa dos beneficios ambientais, socioeconómicos e laborais destas iniciativas.
O proxecto, cun investimento de 25 millóns de euros, evitará a emisión de máis de 45.000 toneladas de CO2 anuais. Ademais, prevé medidas de restauración na contorna do Camiño de Fisterra mediante a plantación de especies vexetais locais.
Paxareiras II convértese así no primeiro parque eólico en recibir autorización baixo o novo procedemento de retramitación, que valora o retorno que estas iniciativas deben xerar no territorio desde o punto de vista ambiental, económico, laboral e social.
A posta en marcha deste parque, que contará con cinco aeroxeradores e unha potencia asociada de 26,4 MW, contribuirá a acadar a neutralidade climática en Galicia no horizonte do ano 2040, achegando o 0,7% da redución de gases de efecto invernadoiro necesaria.
En materia laboral, a execución das obras xerará 97 postos de traballo, aos que se sumarán os empregos de operación e mantemento, primando a contratación local. O proxecto tamén inclúe unha achega anual de 100.000 euros para iniciativas sociais e culturais locais e 52.800 euros para actividades de investigación, desenvolvemento e innovación en Galicia.
