A empresa xestora dos cines xa comunicara ao Concello, propietario do local, a súa intención de cesar a actividade o pasado 31 de marzo. Con todo, esta decisión non se fixo efectiva, mantendo a incerteza sobre a continuidade do servizo.
A situación foi confirmada pola rexedora municipal durante o último pleno, en resposta a unha pregunta dun portavoz da oposición. Este expresou a súa preocupación pola posible perda dun servizo considerado "único e bo para Cee".
“"O Concello intentou buscar solucións, pero o que non pode é condenar débedas. No caso de que finalmente a empresa decida pechar as salas, buscaremos outros operadores ou alternativas para ocupar ese espazo, pero mentres manteñan a actividade non procede."
As débedas que arrastra a compañía son o principal motivo da incerteza. O goberno local mantivo varias reunións cos directivos da empresa, aos que se lles propuxo un plan para abonar a débeda da comunidade nun prazo de 12 anos, pagando a partir de entón só o arrendamento correspondente. Non obstante, esta oferta non foi aceptada.
Os Cines Xunqueira iniciaron a súa actividade en xaneiro de 2004, pouco despois da inauguración do centro comercial. Tras 22 anos de funcionamento, o seu futuro é incerto. De confirmarse o peche, as salas de Carballo serían as únicas operativas na Costa da Morte.
