O proxecto, que arrincou inicialmente en Pantín, Sequeiro e Vilaboa, foi medrando co tempo. Hai dous anos, residentes en Meirás solicitaron a ampliación da actividade á parroquia, creando un grupo no local social de Montefaro. O pasado ano, a asociación de veciños de San Miguel tamén trasladou unha petición similar, o que permitiu poñer en marcha outro grupo no seu local social.
Os obradoiros, que se celebran cada semana, son de balde grazas ao financiamento do Concello de Valdoviño e ao apoio da Deputación da Coruña, que achega ata 7.000 euros ao proxecto.
A través deste programa, o Concello busca promover un envellecemento activo, favorecendo as relacións sociais e combatendo a soidade non desexada. A música utilízase como ferramenta para traballar aspectos clave como a comunicación, a memoria, a motricidade ou a aprendizaxe, sempre dende unha perspectiva lúdica.
