O acordo entre o Concello e o organismo autónomo contempla a posta en marcha dunha aula informatizada onde se celebrarán os exames organizados pola Xefatura Provincial da Coruña, garantindo que se fagan nas mesmas condicións que nas instalacións da propia Xefatura, con procedementos informáticos e terminais con pantalla táctil de uso exclusivo da DXT.
A alcaldesa destacou que "este convenio achega á veciñanza un servizo que ata agora non tiñamos en Narón e que é moi demandado. Vai ser posible examinarse do teórico aquí e coas mesmas garantías que na Xefatura".
O Concello encargarase de seleccionar e acondicionar o local nun prazo máximo de 12 meses, asumindo os custos de adecuación, mobiliario, equipos informáticos, mantemento e seguridade. A aula deberá ser accesible para persoas con mobilidade reducida, contar con aseos adaptados, climatización e conexión a Internet por cable.
Pola súa banda, Tráfico comprométese a realizar exames polo menos unha vez ao mes, facilitar asesoramento técnico e informático, e comunicar o calendario de convocatorias. O persoal municipal axudará a ordenar o acceso e evitar fraudes.
O convenio ten unha duración inicial de catro anos, prorrogable ata catro máis, e o seu seguimento correrá a cargo dunha comisión mixta.
