A alcaldesa, Marián Ferreiro, xunto coas concelleiras de Igualdade, María Lorenzo, e Bibliotecas, Olga Ameneiro, presentaron a programación, que inclúe actividades centradas na ciencia, a cultura e a prevención da violencia machista.
A Semana da Muller na Ciencia, que se celebra ata este sábado, ten a Marie Curie como protagonista. Inclúe a representación teatral A máquina do tempo das científicas no Auditorio municipal, á que asistiron uns 200 escolares de varios colexios. Mañá inaugurarase no Pazo da Cultura unha exposición de paneis sobre a vida de Curie e poderase ver o biopic poético Curie ou a simetría dos fenómenos físicos. O sábado, presentarase o libro Descubre a María Sklodovska-Curie, a cargo das súas autoras.
As propostas continuarán o 16 de novembro coa mostra bibliográfica audiovisual Romper co molde: repensar as masculinidades na Biblioteca municipal, e a estrea do vídeo Gema na canle de YouTube do Concello, centrado en mulleres referentes de Narón e a violencia machista.
Os días 20 e 21 de novembro haberá un obradoiro de defensa persoal no pavillón da Casa da Mocidade, con inscricións ata o 17 de novembro no teléfono 633 497 990. Ademais, o 28 de novembro, a Biblioteca municipal acollerá o contacontos Moito que limpar, dirixido a menores a partir de 4 anos, que aborda a igualdade de xénero.
Durante novembro, os centros de ensino da cidade tamén participan no Escape room pola igualdade, para alumnos de sexto de Primaria. A alcaldesa destacou a importancia da educación, a prevención e o compromiso social para erradicar a violencia contra as mulleres e acadar unha sociedade igualitaria.
