A concelleira de Bibliotecas, Olga Ameneiro, sinalou que "Outubro é un mes no que a biblioteca abre as portas de par en par" co obxectivo de que "veciñas e veciños de todas as idades teñan un motivo para achegarse, descubrir o que ofrece este espazo e sentilo como unha casa propia".
As actividades comezan este xoves, 1 de outubro, coa mostra "Do depósito ao teu fogar". Tras o expurgo veraniego, revisáronse preto de 1.000 volumes, entre os que se atopan novelas, poesía, contos infantís e catálogos de arte. Estes libros, que xa non forman parte da colección, poderán ser levados de balde para a casa por quen estean interesados ata finais de outubro ou ata esgotar existencias.
O sábado 3 de outubro, ás 11:00, a Axencia de Lectura da Gándara acollerá o "Escape room: os segredos da biblioteca", dirixido a rapaces e mozas de 8 a 16 anos. A proposta, da compañía Ludus Formación e Lecer, busca que os participantes resolvan misterios mediante a observación e o traballo en equipo.
As sesións de contacontos continuarán os sábados 10 e 17 de outubro. Paula Carrera presentará "Contos miúdos" o día 10 (para público a partir de 3 anos), mentres que Ana Meilán ofrecerá "Ao meu lado podes ser..." o día 17 (pensado para bebés de 6 a 36 meses). Ambas as actividades, cofinanciadas pola Consellería de Cultura, Educación e Universidade, requiren inscrición previa.
O luns 19 de outubro, ás 18:00, celebrarase o Día das Escritoras cun faladoiro titulado "Elas escriben", no que participarán as autoras locais Ana Varela, Isabel Ramos e Raquel Villanueva. Conversarán sobre a escrita, a conciliación e a construción de personaxes femininas.
A semana do 22 de outubro estará marcada polas visitas guiadas. Haberá unha para o público en xeral o xoves 22 (18:00-19:00) e outra para adultos o venres 23 (11:00-12:00). Tamén o venres 23 haberá unha visita á Axencia de Lectura da Gándara (17:30-18:30). É preciso reservar praza a partir do venres 16 de outubro.
O venres 23 de outubro, ás 19:30, a sala principal acollerá "A corva", un espectáculo de narración oral para público xuvenil e adulto a cargo de Cristina Collazo, inspirado en Carmen Montoiro. A proposta recupera cantos e contos da tradición oral galega.
O sábado 24 de outubro, Día das Bibliotecas, Trémola Teatro presentará "A nena que comía todos os libros" para público infantil a partir de 3 anos. O mes pecharase o sábado 31 coa actividade "O misterio dos calacús", sobre o Samaín, para nenos e nenas a partir de 4 anos, que inclúe conto, busca e obradoiro.
Toda a información sobre a programación e as inscricións, que poden facerse presencialmente ou no teléfono 981 382 173, está dispoñible nas redes sociais da Biblioteca Pública Municipal de Narón.
