O prazo, que se abriu o pasado 9 de setembro, considerouse curto para que o profesorado puidese revisar con calma toda a oferta dispoñible, polo que se decidiu estender o período de solicitude.
Toda a información detallada, incluíndo o dossier completo da programación educativa municipal e o formulario de solicitude, está dispoñible na web buscoactividade.naron.gal. Unha vez cuberto, o formulario debe enviarse por correo electrónico á dirección m.carrodeguas@naron.gal.
A oferta municipal inclúe actividades de coñecemento do contorno, como visitas á Biblioteca Pública Municipal, á Axencia de Lectura da Gándara, ao Pazo da Cultura, ao Centro Sociocomunitario Manuela Pérez Sequeiros, á Ludoteca Municipal e ao Centro de Recursos Solidarios.
Para alumnado de infantil e 6º de primaria proponse un itinerario teatralizado pola Casa Consistorial, que para cursos superiores inclúe un escape room, "Narón é un misterio", onde os estudantes colaboran coa alcaldesa para resolver un enigma de memoria histórica.
En educación para a saúde, mantéñense obradoiros sobre prevención de condutas adictivas, habilidades sociais, uso responsable das novas tecnoloxías, convivencia escolar, prevención do acoso, nutrición saudable e trastornos da conduta alimentaria. Estas actividades diríxense a primaria, ESO e formación profesional, con sesións específicas para familias e profesorado.
Complétase a oferta coas actividades na área medioambiental do Río Xuvia-Pedroso e no Centro de Interpretación dos Muíños Industriais de Xuvia (CIMIX). No Muíño de Pedroso ofrécense obradoiros de recuperación do patrimonio etnográfico (elaboración de pan, queixo, cestería, fiado da lá, coiro), educación ambiental (horta ecolóxica, cosmética natural, marmeladas, reciclaxe creativa, itinerarios polo río Xuvia) e actividades físicas e de lecer no medio natural (tiro con arco, xogos populares, paintball infantil, bubble soccer, escape rooms, obradoiros de prehistoria, electricidade e xogos de lóxica).
No CIMIX, realízanse visitas guiadas á antiga Real Fábrica de Fariñas de Lestache, que poden completarse cun obradoiro didáctico adaptado a cada nivel educativo, desde infantil ata bacharelato.
