A programación de outono inclúe tres sábados de actividades no centro cívico social do Couto, ás 11.00 horas, co obxectivo de fomentar a socialización en galego e o contacto coa natureza.
A primeira cita será o 10 de outubro co obradoiro “A maxia da ciencia”, de Arenaria, onde se realizarán experimentos para descubrir fenómenos físicos e químicos.
O 7 de novembro, o SPEIS de Narón impartirá un obradoiro práctico de primeiros auxilios na montaña, ensinando a actuar ante diferentes incidencias durante rutas naturais.
A clausura será o 21 de novembro co obradoiro de circo de Os Picos do Sol, no que se aprenderán técnicas básicas como o prato chinés, o xogo de pratos, o malabarismo ou os zancos.
A concelleira de Política Lingüística, María Lorenzo, animou ás familias a participar, destacando que "queremos que nenas, nenos e persoas adultas compartan un tempo de lecer na natureza no que o galego sexa a lingua natural da conversa".
As actividades son gratuítas, pero requiren inscrición previa no correo electrónico a.pita@naron.gal, indicando o nome da actividade, os datos do neno/a e do acompañante, así como un enderezo electrónico e teléfono de contacto.
