A delegada da Xunta en Ferrol, Martina Aneiros, visitou esta mañá as instalacións da compañía, que vén de adquirir maquinaria de última xeración co obxectivo de aumentar a súa competitividade e eficiencia enerxética.
Coa axuda recibida, Montaxes Fertri incorporou unha curvadora, un robot de soldadura e unha carretilla de carga lateral. Esta nova dotación permitirá fabricar estruturas de maior envergadura, liberar espazo na nave situada no polígono industrial de Vidreiro e eliminar os fumes de soldadura e combustión no interior.
Aneiros destacou a traxectoria da empresa, que iniciou a súa andaina nos anos 70 e opera en mercados internacionais desde 2003, presente en máis dunha vintena de países. Subliñou a importancia de xerar emprego e afianzar poboación nas zonas rurais a través de convocatorias como esta.
Esta liña de axudas da Consellería do Medio Rural, destinada a reforzar o tecido produtivo nas zonas rurais, contou este ano cun orzamento de 2,7 millóns de euros, cofinanciados polo Fondo Europeo Agrícola de Desenvolvemento Rural (Feader) no marco do Plan estratéxico da PAC 2023-2027.
