O director xeral de Pesca, Acuicultura e Innovación Tecnolóxica, Isaac Rosón, e a directora xeral de Desenvolvemento Pesqueiro, Ángeles Vázquez Suárez, reuníronse coas confrarías para analizar o estado dos recursos e coordinar accións operativas.
Entre as medidas propostas para velar pola sustentabilidade dos bancos atópanse un peche temporal da actividade, a retirada de competidores e o correspondente apoio económico para os profesionais que se vexan afectados por esta paralización.
Ambas as partes destacaron a boa interlocución e a colaboración continuada entre a Administración autonómica e os pósitos da ría para atopar solucións adaptadas ás necesidades da frota. Recentemente, asinouse un convenio con Barallobre dotado con máis de 1,3 millóns de euros para a recuperación de hábitats afectados por baixa salinidade, e un proxecto con Redemar para a avaliación da zamburiña na ría de Ferrol, cun investimento próximo aos 168.000 euros.
Coincidiron na importancia de manter esta coordinación técnica para avaliar a evolución biolóxica dos bancos e asegurar tanto a sustentabilidade dos recursos mariños como a estabilidade económica dos profesionais do sector.
