A delegada territorial da Xunta en Ferrol, Martina Aneiros, e o xerente de Xestión do Solo de Galicia-XESTUR S.A., Diego Toja, anunciaron hoxe a adxudicación á empresa ANTEA IBEROLATAM da redacción do Plan estruturante de ordenación de solo empresarial (PEOSE) desta nova área industrial. A empresa conta cun prazo de execución de 24 meses para este proxecto, cun importe superior aos 199.700 euros máis IVE.
Esta nova plataforma industrial, a primeira bolsa de solo industrial para a cidade de Ferrol, ocupará máis de 1,6 millóns de metros cadrados. Segundo explicou a delegada, este espazo servirá "para acoller o asentamento de novas empresas e fomentar o crecemento económico e empresarial da nosa bisbarra". Aneiros tamén destacou a localización estratéxica da plataforma, cun acceso á autovía Ferrol-Vilalba (AG-64), a estrada N-655 próxima e a tan só 7 km do porto de Ferrol.
O proxecto busca dar resposta á demanda de solo na bisbarra de Ferrolterra, que abarca as comarcas de Ferrol, Eume e Ortegal. Actualmente, os 14 parques industriais activos na zona suman máis de 4,3 millóns de metros cadrados de superficie útil, pero só quedan dispoñibles 140.784 metros cadrados.
