O pasado fin de semana viviu un momento sen precedentes no baloncesto galego. Durante a disputa da “Final Four” da liga autonómica na categoría infantil, celebrada en Santiago de Compostela, o equipo do Basket Ferrol protagonizou unha insólita protesta simbólica. O conxunto ferrolán desprazouse á capital galega co obxectivo de alzarse co campionato, pero antes de enfrontarse ao anfitrión, o Obradoiro, na semifinal, os xogadores decidiron non realizar o salto inicial.

Esta acción, pacífica e espontánea, foi desencadeada pola sospeita dun posible caso de fraude de idade nun dos xogadores do equipo rival. A notable diferenza de altura observada xerou as dúbidas que levaron ao equipo do Basket Ferrol a manifestar o seu descontento. Mentres un dos seus xogadores achegouse ao círculo central para o balón inicial, o resto do equipo permaneceu na liña de tiro libre, esperando o comezo do encontro.

O xesto buscaba defender os valores do baloncesto formativo e concienciar sobre a importancia da integridade nas competicións de base. A protesta non alterou o desenvolvemento normal do partido, que continuou tras o acto simbólico. A pesar da loita do conxunto ferrolán, o Obradoiro impúxose por 91-69, pasando á final onde se enfrontou ao Estudiantes Lugo Río de Galicia.

Finalmente, o Estudiantes Lugo Río de Galicia proclamouse campión tras vencer ao Obradoiro por 75-73. Na loita polo terceiro e cuarto posto, o Basket Ferrol logrou superar ao Básquet Coruña por 79-67, pechando así unha liga na que se alzou a voz contra as prácticas de falsificación de idades.