O proxecto busca facilitar a adopción de cambios sostidos no estilo de vida, especialmente na alimentación e a actividade física, que son cruciais para os pacientes con esta patoloxía. O equipo, composto por enfermería, facultativos de Nefroloxía, nutricionistas, fisioterapeutas e desenvolvedores informáticos, considera que as ferramentas dixitais son unha oportunidade para ofrecer información rigorosa e accesible que complemente a atención médica habitual.
Están a desenvolver un portal web intuitivo con contidos validados por este equipo. Inclúe seccións sobre a enfermidade renal crónica, alimentación (con información sobre nutrientes, etiquetas e técnicas culinarias), receitas de cociña, exercicio físico, actividades interactivas e vídeos formativos. Tamén achega ligazóns de interese a organizacións con recursos sobre a enfermidade.
Esta ferramenta facilita a alfabetización en saúde, empodera ao paciente no seu autocoidado e promove hábitos de vida saudables de forma segura, reducindo a variabilidade da información que os pacientes obteñen en fontes non acreditadas.
Os profesionais concluíron que a plataforma mellora a autonomía do paciente e fomenta hábitos de vida saudables de maneira segura, minimizando a información non fiable obtida doutras fontes.
