A final do Mundial que enfrontará este domingo ao combinado español contra Arxentina (21.00 horas) contará cunha pantalla xigante na Praza de España de Ferrol para que a cidadanía poida seguir a cita. A elección deste espazo, de maiores dimensións que a Praza da Constitución onde se viu a semifinal, busca permitir a entrada de máis xente e salvagardar a seguridade.
Ademais dun monitor de seis metros por catro, desde as 19.00 horas haberá ambiente coa música do DJ Robinson Ramos, que animará as dúas horas previas ao partido.
A prioridade do Concello é garantir a seguridade dos asistentes. Despregase un operativo sen precedentes cun perímetro vallado con capacidade para unhas 6.000 persoas. Contará con controis de acceso en dous puntos: na rúa Galiano e na lateral de Recimil, á altura da Praza de Sevilla.
Non se permitirá o acceso con obxectos prohibidos, como bebidas alcohólicas ou recipientes de cristal. Tamén se instalará un Posto de Mando Avanzado (PMA) na Oficina de Turismo para coordinar os servizos de emerxencia e seguridade. A pantalla situarase na entrada da estrada de Castilla, sobre o túnel.
O dispositivo de seguridade estará composto pola Policía Local e Nacional, a Unidade de Intervención Policial (UIP), Bombeiros e Protección Civil.
