Tras o recente cambio na presidencia de O Parrulo Ferrol, coa chegada dun novo líder, comezan a desvelarse os detalles do proxecto que encabezará o actual seleccionador de Kuwait. A nova etapa, que se iniciará formalmente o 1 de xullo, centrarase en catro eixes principais para a transformación do club.
Os piares fundamentais inclúen a incorporación dun equipo de traballo altamente cualificado, o apoio institucional, a creación dun ecosistema empresarial que garanta o retorno do investimento e o desenvolvemento dun modelo de negocio para as instalacións deportivas. Ademais, a afección, considerada un "gran patrimonio", xogará un papel crucial no crecemento e recoñecemento da marca O Parrulo a nivel nacional.
“"Imos buscar máis dun patrocinador. Está moi ben vender espazos na camiseta ou no pantalón, pero tamén hai que vender experiencias."
Un dos puntos máis destacados da nova estratexia é a énfase na escola de O Parrulo, que se busca converter de novo nun referente a nivel galego e nacional. Para iso, anunciarase en breve un novo director que implementará unha metodoloxía específica, con especial atención ao rendemento e á formación dos xogadores.
O proxecto tamén contempla a creación dunha área psicolóxica para ofrecer orientación académica, fortalecendo a relación entre o club, as familias e os centros educativos. Así mesmo, incorporarase unha área de fisioterapia e recuperación funcional con especialistas que traballarán directamente cos nenos desde o primeiro día. Tamén se establecerá un servizo de atención aos pais, co obxectivo de fomentar convenios de colaboración con outros clubs da comarca e potenciar o equipo feminino, escoitando as necesidades de todos os implicados.
