Comerciantes, provedores e clientela do Mercado de Recimil celebran a finalización das obras que renovaron por completo o perímetro da superficie comercial. O firme anterior presentaba un notable deterioro debido á falta de mantemento, o paso do tempo e o constante tránsito de vehículos pesados que acoden diariamente a descargar mercadoría.

A empresa Civis Global foi a encargada duns traballos que se adxudicaron por 154.000 euros. Esta actuación enmárcase na estratexia do Concello de Ferrol para “converter os mercados na referencia para adquirir produtos de proximidade, potenciando o comercio local”, segundo destacou o alcalde cando se anunciou a aprobación da Xunta de Goberno Local.

O pavimento retirado estaba composto por lousas de formigón prefabricado que cubrían unha superficie de 1.300 metros cadrados. Durante os tres meses que duraron os traballos, o chan foi substituído por unha capa de material de 25 centímetros de espesor, deseñada especificamente para soportar o tráfico de camións.

En canto ao propio Mercado de Recimil, que tamén presenta elementos deteriorados, a titular da área de Urbanismo informou de que o seu departamento ten finalizado un proxecto para unha reforma integral. Actualmente, están na procura de fondos económicos para levalo a cabo, xa que unha solicitude de subvención anterior foi rexeitada. O Concello busca agora novas liñas de axudas para este espazo, considerado un dinamizador clave do barrio.

Ademais da obra no mercado, no seu entorno tamén se están a executar melloras na envolvente do número 8 da estrada de Castela. Estes traballos, adxudicados en decembro á empresa Eiffage Enerxía por 265.606 euros, teñen un prazo de execución de seis meses.