O pasado 23 de setembro, a Facultade de Turismo da Universidade da Coruña organizou unha xornada dedicada á accesibilidade no turismo. O evento reuniu expertos e académicos para debater sobre os desafíos actuais e as vías para lograr unha actividade turística máis inclusiva.
Participaron na mesa redonda Andrea Rey, especialista en accesibilidade; Ana Leiras, do Centro Superior de Hostalería de Galicia (CSHG); e Adriana Miguens e Sonia Fuentes, de Estela de Mar de Amicos II. A moderación correu a cargo de Antonia Pérez García, da Universidade da Coruña.
O obxectivo principal foi achegar a accesibilidade turística á comunidade universitaria desde unha perspectiva práctica, combinando investigación, experiencia profesional e boas prácticas. Subliñouse a importancia de entender a accesibilidade non como unha medida illada ou para colectivos específicos, senón como un factor que mellora a calidade xeral da experiencia turística e dos destinos.
Esta actividade forma parte do ciclo Cafés Viaxeiros, unha iniciativa impulsada por Iria Caamaño Franco e Sarah Moss desde a Facultade de Turismo da UDC, que busca crear un espazo de intercambio entre a universidade, os profesionais e as entidades do sector turístico.
