Esta nova remesa de rótulos, que se suma ás xa entregadas en parroquias como San Xiao, Castro, San Mateo e O Val, ten como obxectivo mellorar a localización dos inmobles para facilitar o traballo dos servizos de emerxencia, así como do reparto postal e de paquetería.
Segundo o prego técnico, a maior parte das placas destinaranse a Sedes (637 unidades), seguida da zona urbana de Narón (575) e Pedroso (491). O resto repartirase entre Doso, San Xiao, O Val, Castro e San Mateo. As empresas interesadas teñen de prazo ata o 2 de outubro ás 14.00 horas para presentar as súas ofertas.
As placas, de 15x15 centímetros e tres milímetros de grosor, incluirán o escudo local, os cores corporativos e un código QR individual que permitirá consultar datos catastrais. Ademais, a empresa adxudicataria deberá garantir a durabilidade dos materiais durante un período de dez anos, salvo en casos de forza maior ou uso indebido.
