A procesión marítima da Virxe do Carmen xa é unha cita ineludible no porto de Ferrol. A celebración, que cada ano reúne a centos de persoas e numerosas autoridades, tivo lugar o pasado 17 de xullo.
Nesta ocasión, a procesión contou coa participación do presidente da Xunta de Galicia, Alfonso Rueda, acompañado do presidente da Autoridade Portuaria de Ferrol-San Cibrao, José Antonio Álvarez, e da conselleira do Mar, Marta Villaverde. Tamén estiveron presentes o alcalde de Ferrol, José Manuel Rey Varela, e o almirante do Arsenal, Vicente Rubio Bolívar.
A comitiva comezou ás 19:00 horas coa saída da imaxe da Virxe dende o Arsenal Militar de Ferrol. Tras un percorrido en terra, a imaxe embarcou nun dos buques cedidos para a procesión marítima pola ría, que durou aproximadamente unha hora. Durante a travesía realizouse unha ofrenda floral oficiada polo bispo de Mondoñedo-Ferrol, Fernando García Cadiñanos.
Unhas 400 persoas en 15 embarcacións acompañaron a Virxe do Carmen. O buque Rías Altas Uno, habilitado pola Autoridade Portuaria, completou as súas 150 prazas, demostrando o arraigo da celebración na cidade. Tras finalizar, a imaxe foi levada á igrexa de Nuestra Señora del Socorro.
A Autoridade Portuaria de Ferrol-San Cibrao organiza este evento para preservar as tradicións, co apoio do Arsenal e o Concello de Ferrol.
