O suceso ocorreu na mañá deste domingo, cando un particular alertou ao 112 Galicia de que unha muller caera por un cantil na parte inferior do Cabo Prior. Segundo explicou a testemuña, a vítima quedou tendida contra as rochas nunha zona de moi difícil acceso.
Os xestores do 112 Galicia activaron de inmediato o protocolo de emerxencias. Deste xeito, déuselles aviso ao Servizo de Urxencias Sanitarias de Galicia-061, que enviou unha UVI móbil ao lugar. Tamén se mobilizaron os Bombeiros de Ferrol, Salvamento Marítimo, o Servizo de Gardacostas de Galicia, a Policía Nacional e a Policía Local.
Unha vez no punto do suceso, o persoal do Servizo de Urxencias Sanitarias de Galicia-061 confirmou o falecemento da muller. Segundo determinaron os sanitarios, o forte impacto provocado pola caída resultou mortal para a vítima.
