A titular de Defensa desprazouse á cidade para transmitir persoalmente o seu recoñecemento ás tripulacións destas dúas unidades, consideradas "claves no despregamento realizado no sur de Chipre tras a deterioración da situación en Oriente Medio", segundo fontes do Ministerio.
Robles subliñou ante as dotacións e mandos das fragatas F-104 e F-105, integradas no Grupo de Combate Aeronaval francés do portaavións Charles de Gaulle, que "a achega española á seguridade e a estabilidade, así como o noso compromiso con calquera das misións de mantemento da paz, están fóra de toda dúbida".
Acompañada polo Almirante Xefe de Estado Maior da Armada (Ajema), Antonio Piñeiro; o responsable do Arsenal, o vicealmirante Vicente Rubio Bolívar; e o comandante da 31 Escuadrilla, Javier González-Cela, a ministra destacou que a presenza española contribuíu a garantir a seguridade no flanco do sueste europeo e a soster a liberdade de acción aliada no Mediterráneo oriental.
A ministra mostrouse agradecida polo traballo e o compromiso das dotacións, afirmando que "Ferrol, Galicia e toda España teñen sobrados motivos para sentirse orgullosos de todos vostedes e da Armada". Engadiu que "estamos nun momento internacional moi difícil, no que as nosas Forzas Armadas están a demostrar estar, sobradamente, á altura, alá onde se require a súa presenza".
Desde o Ministerio recordan que o despregamento, no que a Cristóbal Colón estivo primeiro e a Méndez Núñez deulle a substitución despois, produciuse nun "espazo de elevada sensibilidade estratéxica pola súa proximidade a Siria, Líbano e as rutas marítimas do Mediterráneo oriental". Alí, as F-100 desempeñaron misións esenciais como a protección antiaérea do grupo de combate francés e a vixilancia avanzada fronte a ameazas aéreas.
Ambos os buques pertencen á 31 Escuadrilla, que conta con 1.300 efectivos, os buques de aprovisionamento Patiño e Cantabria, e as cinco fragatas da clase Álvaro de Bazán, destacando a unidade pola súa "flexibilidade, adaptabilidade e interoperabilidade, xunto á alta dispoñibilidade e preparación do persoal".
