O Portal de Contratos Públicos de Galicia publicou a licitación destes dous contratos independentes. A actuación no centro de saúde de Serantes conta cun orzamento de 102.452,24 euros, mentres que para o centro de saúde Fontenla Maristany o investimento ascende a 166.452,44 euros.
As obras adaptaranse aos horarios laborais e ás necesidades do servizo, garantindo en todo momento a actividade asistencial como prioridade, xa que se realizarán en centros en funcionamento.
As empresas interesadas teñen ata o 5 de novembro para presentar as súas ofertas.
No caso do centro de saúde de Serantes, o contrato céntrase na dotación dun sistema de climatización e ventilación para o edificio. Pola súa banda, no centro de saúde Fontenla Maristany, o expediente inclúe a instalación dun novo cadro eléctrico para as unidades exteriores de climatización no patio exterior do primeiro andar, así como novos cadros eléctricos para os pisos primeiro, segundo e terceiro para alimentar as unidades interiores de climatización e os recuperadores de calor de nova instalación.
