A xornada, que se desenvolverá en formato online a través da plataforma Zoom, abordará aspectos clave como a sanidade vexetal, a transformación artesanal e industrial, a comercialización coa industria sidrera, os contratos de subministro e as posibilidades de diversificación e enoturismo. Esta iniciativa dá continuidade á primeira edición celebrada en 2025, que se centrou no cultivo e produción.
O programa contará coa participación de profesionais e especialistas do ámbito da investigación, sanidade vexetal, Administración e industria. A apertura correrá a cargo de Carlos Ares, director xerente de AGACA. A primeira intervención, a cargo de Xosé A. Meijide (CIAM), analizará a situación da mazá de sidra en Galicia.
Posteriormente, Rosa Pérez (Estación Fitopatolóxica de Areeiro) afondará nas principais pragas e enfermidades do maceira e o seu manexo. Incluirase tamén un webinar con Lucio García (CETECA) sobre o GO Supraolivo.
Na segunda parte da mañá, Miguel López Sieiro (subdirector xeral de Coordinación da PAC) analizará a cadea alimentaria, os contratos e custos de produción. José Luis Olmedo (Custom Drinks/Sidra Maeloc) explicará as claves da comercialización industrial e os contratos coa industria sidrera.
A diversificación será outro eixo central. Miguel Soto (Asociación Maceira e Sidra da Estrada) presentará a Ruta da Sidra como modelo de valorización territorial e as posibilidades do enoturismo. A xornada pecharase coas experiencias de produtores como José Antonio López Pampín (A Estrada) e Jesús Rodríguez Raposo (Alfoz).
A formación está dirixida a socios de cooperativas e CUMAS, produtores, persoal técnico, investigadores, vinculados á economía social, estudantes e público xeral interesado no sector. A inscrición é gratuíta e realízase a través de Zoom. A xornada terá lugar o 17 de setembro de 2026, de 9:30 a 14:30 h, enmarcada na Rede Eusumo.
