O incidente produciuse ás 9.25 horas, cando Adif alertou sobre o lume na cabina dianteira do tren de Ancho Métrico. A bordo viaxaban menos de dez persoas, que foron desaloxadas de forma segura e sen sufrir lesións.
O maquinista intentou controlar as chamas cun extintor, pero o lume non se extinguiu por completo e xerou unha densa columna de fume. Ao lugar acudiron efectivos dos Bombeiros do Eume e axentes da Garda Civil, que finalmente lograron sufocar o incendio.
O foco localizouse no motor da máquina, que non tería resultado gravemente danado.
Como consecuencia do suceso, a circulación ferroviaria viuse interrompida temporalmente entre as estacións de Moeche e Cerdido, aínda que o tráfico xa foi restablecido. Os viaxeiros afectados foron trasladados ao apeadoiro de Entrambarrías, tamén en Moeche, para continuar a súa viaxe ou recibir asistencia.
