O Museo Naval de Ferrol acolle unha exposición que celebra o tricentenario da creación do Departamento Marítimo do Norte, un evento que cambiou o rumbo da cidade. Esta efeméride remóntase a 1726, cando o monarca Felipe V decidiu establecer tres departamentos navais na península, sendo Ferrol o elixido para o Norte.
“"Ferrol e a Armada son un binomio inseparable, non se entenderían o un sen o outro. É parte do ADN da cidade, porque foi creada ad hoc polo rei como base naval."
A decisión real implicou a compra do territorio, que ata entón era un señorío nobiliario, para convertelo nunha vila de realengo e construír o gran arsenal. Inicialmente, a base naval estableceuse na Graña, nos terreos onde hoxe se atopa a Escola de Especialidades. Posteriormente, a sede trasladouse a Ferrol, reinaugurándose en 1858 coa presenza da raíña Isabel II para a botadura do primeiro barco de vapor, o Jorge Juan.
A exposición tamén rende homenaxe a figuras clave como José Patiño y Rosales, intendente xeral e ministro durante o reinado de Felipe V, quen impulsou a reconstrución das defensas navais españolas e ordenou a construción do Arsenal da Graña. Outras pezas históricas inclúen o plano orixinal de Vicente Tofiño de 1789 e a espada do primeiro capitán xeneral, Francisco Javier Cornejo y Vallejo.
Entre os obxectos expostos, destacan tres metopas do Palacio de Capitanía cos nomes dos 107 comandantes que pasaron polo Departamento do Norte e a Zona Marítima do Cantábrico, desde 1730 ata 2003. A mostra, inaugurada o pasado 15 de abril, estará dispoñible ata o 28 de xuño.
