A cita, que terá lugar no pavillón da Xunqueira, na parroquia de San Valentín, contará coa participación de 25 escolas e un total de 316 palilleiras. Este encontro busca non só exhibir a destreza no encaixe de bolillos, senón tamén servir de escaparate para outras disciplinas manuais como o bordado, o punto ou calceta e o patchwork.
“"Esta xuntanza é unha mostra do valor que teñen as nosas tradicións e o traballo artesanal, que forma parte da nosa identidade colectiva. Permiten manter vivo un saber que se transmite de xeración en xeración, ao tempo que xeran espazos de encontro e participación cidadá."
A xornada desenvolverase en horario partido, de 10:30 a 14:00 horas pola mañá e de 16:00 a 19:00 horas pola tarde, e será de carácter gratuíto e aberto ao público. O obxectivo é fomentar a convivencia e a transmisión de saberes entre xeracións, poñendo en valor o patrimonio inmaterial da artesanía.
“"A participación de máis de 300 palilleiras e 25 escolas confirma o interese e a vitalidade desta actividade, que ademais contribúe a dinamizar a vida social e económica do noso concello."
Desde o Concello de Fene realizouse un chamamento á veciñanza e aos visitantes para que se acheguen ao pavillón da Xunqueira, co fin de admirar de preto a destreza das artesás e gozar dun ambiente festivo. A iniciativa conta coa colaboración da Deputación da Coruña.
