O establecemento de catro estrelas, situado aos pés da praza de España en Ferrol, era xestionado nos últimos anos polo seu anterior propietario, quen xa o vira pasar por outras cadeas como Barceló ou Carrís. Esta nova integración supón un paso máis na modernización e adaptación do hotel aos novos tempos, mantendo a súa relevancia histórica na cidade.

A nova propietaria é a división de explotación hoteleira do Grupo Hotusa, fundado por un empresario de Chantada. En 2005, a cadea creou a marca Eurostars Hotels, que se convertería na primeira marca de Eurostars Hotel Company. Esta marca caracterízase por ofrecer establecementos de gama alta con localizacións estratéxicas e unha proposta versátil, adaptada ás necesidades dos viaxeiros, con instalacións completas e un servizo coidado. Posteriormente, sumáronse outras marcas como Exe Hotels, Ikonik Hotels, Crisol Hotels, Áurea Hotels, Tandem Suites e Dorma Hotels.

Na actualidade, a cadea conta cun portafolio de 300 establecementos distribuídos en grandes capitais españolas e en importantes destinos internacionais como Nova York, Chicago, Berlín, Roma, Praga, Budapest, Lisboa, Porto, Bos Aires ou Cidade de México, entre outros. O anterior propietario do Hotel Almirante continúa sendo o dono doutro establecemento hoteleiro na comarca, o Pazo Libunca, en Narón, aínda que a súa xestión tamén foi delegada a unha empresa especializada.

O Hotel Almirante, un dos hoteis con máis historia de Ferrol, tamén se incorporou recentemente á Rede Stelar de establecementos comprometidos coa excelencia no Camiño Inglés. Esta rede agrupa aloxamentos e restaurantes que traballan para ofrecer unha atención coidada, profesional e adaptada ás necesidades dos peregrinos.