O presidente de Cofer, Cristóbal Dobarro, manifestou este luns que calquera proxecto que veña a investir na zona terá "todo o apoio" da patronal e das institucións. "Non podemos máis que felicitarnos", asegurou, engadindo que a chegada de SAIC é "unha moi boa noticia" para toda a cidadanía.

Dobarro subliñou que a automoción é un sector "de alto valor engadido e de emprego estable e intensivo", e que a implantación da multinacional chinesa supón "un paso cara á sempre tan demandada diversificación industrial" da comarca. Ademais, considerou que esta industria "podería resultar complementaria para as empresas xa existentes na zona".

O representante empresarial lembrou a "longa tradición industrial" e a "capacidade de desenvolvemento de proxectos" de Ferrolterra, así como a experiencia dos seus traballadores, factores que Dobarro cre que "favoreceron a implantación desta industria".

Segundo Dobarro, a factoría de SAIC terá "un efecto tractor" non só para o sector da automoción, senón tamén "para o resto das actividades industriais", xerando un "círculo virtuoso" de riqueza. "Todo o noso apoio ao proxecto", insistiu, "e esperamos que pronto poidamos ver como se vai materializando".