O sindicato Comicións Obreiras (CCOO) cualificou este venres de "folletín propagandístico" o Plan Estratégico presentado por Navantia, despois de que a empresa paralizase a súa aprobación no Consello de Administración e abrise un proceso de diálogo.
O secretario xeral de CCOO-Industria en Galicia, Víctor Ledo, denunciou que o documento, elaborado desde 2023, non concreta o dique cuberto para Ferrol nin fixa un plan de emprego por centros, deixando a Navantia Fene "nunha situación catastrófica e inasumible".
Ledo explicou que a dirección de Navantia pretendía entregar o plan sen consenso, e que a presión de CCOO ante a SEPI logrou abrir un período de achegas ata o día 30. "Nós non imos entrar nese debate de dar achegas. Ese non é o mecanismo que defende Comicións Obreiras. Defendemos unha negociación con calendario e mesas de traballo en cada liña de actuación", subliñou.
O sindicalista criticou que o plan fixe obxectivos como alcanzar 17.500 millóns de carteira ou aumentar os marxes ao 12%, pero sen explicar como se lograrán nin que investimentos concretos se executarán. Sinalou que o anterior plan incluía máis de 500 millóns de euros, mentres que este fala de 192, e cuestionou que se pretenda ocupar as instalacións ao 80% "sen especificar se iso exclúe a Puerto Real e Fene", esixindo que Fene teña o mesmo tratamento que o resto dos centros.
Pola súa banda, Iván López, secretario xeral da sección sindical de CCOO en Navantia Ferrol, denunciou que o plan busca "precarizar o convenio" recentemente negociado e trasladar toda a presión aos traballadores. Reclamou 1.200 empregos directos para reducir a subcontratación e advertiu de que a fábrica dixital de bloques "non ten sentido sen o dique cuberto". Tamén esixiu a modernización dos equipos de elevación, con 50 anos de antigüidade.
Adela López, secretaria xeral de CCOO en Navantia Fene e presidenta do comité de empresa, puxo o foco na situación do seu estaleiro: "Fene é o único centro de Navantia que non ten carga de traballo neste momento, e o plan condiciona o emprego e os investimentos a esa carga". Reclamou que Fene poida diversificar a súa actividade e recuperar o seu papel pioneiro en I+D.
CCOO avanzou que non asinará o plan se non se dan garantías de negociación real e emprazou ao Goberno a posicionarse para evitar que o documento saia adiante "nos termos actuais". Os sindicalistas insistiron en que a plantilla debe poder votar o plan industrial e pediron un sistema de auditoría e seguimento.
